Германиянинг нуфузли fussballfieber.de спорт нашри 2026 йилда Канада, Мексика ва АҚШда бўлиб ўтадиган футбол бўйича Жаҳон чемпионатида илк бор иштирок этадиган терма жамоалар — Кюрасао, Иордания ва Кабо-Верде қаторида Ўзбекистон терма жамоаси ҳақида махсус мақола эълон қилди.
Ўзбекистон терма жамоаси 2026 йилда ўз тарихида илк бор Жаҳон чемпионатида иштирок этади. Бунгача ўзбекистонлик футболчилар етти бор мундиал йўлланмаси учун курашган, бироқ ҳар сафар омад етишмаган. Мухлислар томонидан меҳр билан “Оқ бўрилар” деб аталадиган терма жамоа ниҳоят 2025 йил 5 июнь куни саккизинчи уринишда тарихий мақсадга эришди.
БАА терма жамоасига қарши 0:0 ҳисобидаги дуранг Ўзбекистонга Жаҳон чемпионати йўлланмасини тақдим этди. FIFA рейтингида ўша вақтда 58-ўринда бўлган Ўзбекистон шу тариқа Марказий Осиёдан ЖЧга чиққан илк давлатга айланди. Аҳолиси қарийб 37 миллион бўлган мамлакат ЖЧ–2026 турниридаги энг йирик дебютант сифатида қайд этилди. Саралаш босқичида ўзбекистонликлар 2022 йилги мундиал мезбони Қатарни ҳам ортда қолдирди.
Ғалаба ва эътироф
Тарихий натижа мамлакат бўйлаб катта шодиёна билан қарши олинди. БААга қарши учрашувдан сўнг футболчилар вақтинчалик бош мураббий Тимур Кападзени рамзий тарзда сув сепиш орқали табриклади. Албатта, алкогольсиз, чунки Ўзбекистон мусулмон мамлакатидир.
Муваффақият давлат даражасида ҳам эътироф этилди. Ўзбекистон Республикаси Президенти Шавкат Мирзиёев Жаҳон чемпионатига чиққан барча футболчиларни фахрий унвонлар, орден ва медаллар билан тақдирлади. Шунингдек, ҳар бир футболчига янги автомобиль совға қилинди.
“Оқ бўрилар” етакчилари
2026 йилги ЖЧда Ўзбекистон терма жамоасини икки муҳим шахс бошқаради. 2025 йил октябрьидан буён жамоани Фабио Каннаваро бошқариб келмоқда. Қизиқ жиҳати шундаки, бу лавозим дастлаб германиялик мутахассис Йоахим Лёвга таклиф қилинган, бироқ у рад жавобини берган. Натижада 2006 йилги Жаҳон чемпиони бўлган италиялик мураббий ўзбекистонлик футболчиларни мундиалга тайёрламоқда.
Жамоа етакчиларидан бири — ҳимоячи Абдуқодир Ҳусанов. У 2025 йил январдан буён Пеп Гвардиола қўл остида “Манчестер Сити” сафида тўп сурмоқда ва Англия Премер-Лигасида ўйнаётган илк ўзбекистонлик футболчи сифатида тарихга кирган.
Мундиал синовлари
ЖЧ–2026 турнирида Ўзбекистонни жиддий синовлар кутмоқда. “К” гуруҳи доирасида “Оқ бўрилар” 2016 йилги Европа чемпиони Португалия ва афсонавий Криштиану Роналдуга қарши баҳс олиб боради. 41 ёшли Роналду эҳтимолий сўнгги ЖЧда бир қатор рекордларни янгилашни кўзламоқда, жумладан, мундиалда иштирок этган энг ёши катта футболчи ва энг ёши катта гол муаллифи сифатида.
Шунингдек, Ўзбекистон Колумбия ва яна плей-офф орқали аниқланадиган терма жамоага қарши майдонга тушади. Дебютант бўлишига қарамай, “Оқ бўрилар” фақат тажриба орттириш билан чекланмайди — улар гуруҳдаги учинчи ўрин орқали плей-офф босқичига чиқиш имкониятини жиддий кўзламоқда.
