«Барселона»нинг чап қанот ҳимоячиси Хофре Торрентс жамоани тарк этишни истамади. Catalunya Radio хабарига кўра, 19 ёшли футболчи Испания ва хориж клубларидан бир нечта таклиф олган, бироқ уларнинг барчасига рад жавобини бериб, клубда қолишга қарор қилган. Бош мураббий Ханс-Дитер Флик ёш латералнинг истиқболига ишонади, «кўк-анорранглилар» раҳбарияти ҳам футболчининг салоҳиятини юқори баҳоламоқда.
Хофре Торрентс асосан «Барселона»нинг иккинчи жамоасида тўп суради, бироқ у аллақачон асосий таркибда тўртта ўйин ўтказишга улгурди. Transfermarkt портали испаниялик футболчини 1 миллион еврога баҳоламоқда, унинг каталонияликлар билан шартномаси 2028 йилнинг ёзига қадар мўлжалланган.
