"Қизилқум" - "Насаф" учрашуви ўз ниҳоясига етгач меҳмонлар бош мураббийи Рўзиқул Бердиев матбуот анжуманида иштирок этиб, қуйидагиларни таъкидлади.

"Учрашув жуда қийин бўлди. "Қизилқум"нинг бизга қарши яхши тайёргарлик кўргани сезилиб турди. Айниқса бугунги рақибимиз дарвозабони ва ҳимоячилар яхши ўйин кўрсатишди. Қолаверса маҳаллий мухлислар ҳам бугун ўз жамоасини яхши қўллаб туришди, шунингдек Қаршидан ҳам бизнинг жамоамиз мухлислари ташриф буюришиб, бизга далда бўлишди, бунинг учун уларга жамоамиз номидан ташаккур изҳор этаман. Аммо биз рақибимизга нисбатан жисмоний тайёргарлигимиз ва ўйинчиларимизнинг тажрибаси эвазига, кичик ҳисобда бўлсада ғалаба қозонишга эришдик",-дейди Рўзиқул Бердиев.

- Энди "Насаф"ни совринли ўринлар учун курашиши яққол маълум бўлди, айтингчи "Насаф" бу йил чемпионлик учун курашадими?

- Ҳали чемпионат давом этмоқда, олдимизда анча ўйинлар бор, албатта ҳар бир имкони бор жамоа бундай мақсаддан мустасно эмас. Ўз ўрнида биз ҳам ҳаракат қилаяпмиз ва ҳаракат қилаверамиз, чемпион бўлиш бизнинг энг катта орзуимиз. Биз учун ҳозирги пайтдаги энг асосий мақсад олдимизда турган учрашувларни муваффақиятли ўтказиш ва яхши натижаларни қўлга киритиш. Жорий чемпионатда кўпчилик ёшларга таянган жамоамиз ўз ўйинини топиш учун жуда кўп тер тўкишга тўғри келди.

Ўйлайманки ана шу оғир меҳнатлар эвазига ўзимизни ички имкониятдан келиб чиқиб, жамоамизни шакллантира олдик, бу жараён тўхтагани йўқ. Ҳали кўзга кўринмаган, кўзлари ёниб турган ёшларимиз жуда кўп, умид қиламанки келгусида улар ҳам жамоада ўз ўринини топиб олишади. Биз ўз йўлимизда давом этаверамиз.