Мадриднинг «Реал» клуби ёзги трансфер ойнасида ярим ҳимоя чизиғини кучайтиришни режалаштирмоқда.

Турли манбалар бир неча бор хабар берганидек, «қаймоқранглилар» раҳбарияти Тони Кроос ва Лука Модрич кетганидан сўнг жамоа ярим ҳимоясида креативлик етишмаяпти, деб ҳисоблайди. «ESPN» маълумотларига кўра, "ПСЖ" хавбеки Витинья Испания грандининг шорт-листида биринчи ўринда қолмоқда, бироқ португалиялик футболчини келаётган ёзда сотиб олишнинг деярли иложи йўқ. Шунингдек, «Реал»да парижликларнинг бошқа бир футболчиси — Фабиан Руис номзоди ҳам муҳокама қилинган. Яна бир жиддий номзод — Нидерландиянинг «АЗ Алкмаар» клуби ёш истеъдоди Кес Смитдир.

«Transfermarkt» портали мутахассислари Витинья, Руис ва Смитнинг нархини мос равишда 110, 40 ва 22 миллион еврога баҳоламоқда.