Мадриднинг "Атлетико" клуби бош мураббийи Диего Симеоне ва спорт директори Матеу Алемани ўртасидаги муносабатлар қишки трансфер ойнасидан сўнг ёмонлашди. Юзага келган келишмовчиликлар аргентиналик мутахассиснинг 2027 йилгача мўлжалланган шартномасига қарамай, клубдаги келажагига таъсир қилиши мумкин. Бу ҳақда Sport.es хабар бермоқда.
Манбага кўра, "матрасчилар" мавсум якунида жамоани тарк этиши мумкин бўлган Симеонега ўринбосар излашга киришган. Таъкидланишича, бунга биринчи навбатда Алемани билан қарама-қаршиликлар эмас, балки жамоанинг натижалари таъсир қилиши мумкин. Аргентиналик сўнгги ойларда йўқотилган ишончни қайтариш учун "Атлетико" кўрсаткичларини яхшилаши керак.
"Борнмут" бош мураббийи Андони Ираола Симеоненинг ўрнига асосий номзод бўлиб турибди. Аммо испанияликнинг ўзи фаолиятини Англия чемпионатида давом эттиришни маъқул кўрмоқда.
