«Шарлотт» вингери Нимфаш Берчимас МЛСни тарк этиб, фаолиятини Европанинг топ-клубида давом эттириши мумкин. Бу ҳақда инсайдер Экрем Конур хабар бермоқда.
Манба берган маълумотларга кўра, 17 ёшли футболчини ўз сафига қўшиб олишга Мюнхеннинг «Бавария» ва Англиянинг «Манчестер Юнайтед» клублари қизиқиш билдирмоқда. Германия гранди ўйинчи учун асосий даъвогар ҳисобланаётган эди, бироқ «қизил иблислар» Бундеслига чемпионининг режаларига тўсқинлик қилиши мумкин.
Берчимаснинг Америка клуби билан шартнома мажбуриятлари жорий йилнинг якунига қадар мўлжалланган. Нуфузли «Transfermarkt» портали экспертлари футболчининг бозор қийматини 300 минг еврога баҳолашмоқда.
