«Бавария» бош мураббийи Венсан Компани Марк-Андре тер Штегеннинг янги жароҳати фонида дарвозабон Мануэль Нойернинг Германия терма жамоасига қайтиши мумкинлиги ҳақидаги саволга жавоб берди.
«Вазият ўзгаргани йўқ. Ману мен билан тенгдош. Баъзан мен унга бир қанча маслаҳатлар беришим мумкин. Лекин у ўз қарорларини ўзи қабул қилиш учун етарлича тажрибага эга. У — ўзгача инсон ва ўзгача дарвозабон. Мен унинг ҳозирги ўйинидан завқ олишини истайман. Қолган ҳамма нарса — ОАВда муҳокама қилинадиган мавзу холос», — дея Компанининг сўзларини келтирмоқда «Bayern & Germany».
Нойер 39 ёшда. У Германия терма жамоаси сафида 124 та ўйин ўтказиб, 118 та гол ўтказиб юборган ва 51 та баҳсда ўз дарвозаси дахлсизлигини сақлаб қолган.
Эслатиб ўтамиз, 2024 йилги уйда ўтган Европа чемпионатидан сўнг Нойер миллий жамоадаги фаолиятини якунлашга қарор қилган эди.
