Саудиянинг «Ан-Наср» клуби ҳужумчиси Криштиану Роналду ўзининг ҳозирги ҳолатидан норози ва ўйинларни бойкот қилишда давом этмоқда. Матбуотда 41 ёшли португалиялик футболчи клубни алмаштириш ҳақида ўйлаётгани ҳақида хабарлар тарқалди.
«The I paper» нашри берган маълумотларга кўра, юлдуз ҳужумчининг «Манчестер Юнайтед»га қайтиши деярли имконсиз масала. «Қизил иблислар» Криштианунинг учинчи бор жамоага келишидан манфаатдор эмас. Роналду манкунианликлар сафида 2003 йилдан 2009 йилгача, шунингдек, 2021 йилдан 2022 йилгача тўп сурган.
Беш карра «Олтин тўп» соҳиби 2023 йилнинг январидан бери Саудия Арабистонида фаолият юритмоқда. Унинг «Ан-Наср» билан меҳнат шартномаси 2027 йил июнь ойи охирида якунига етади.
