Тошкентдаги Боткин номидаги қабристонда 1979 йилда фожеали тарзда ҳалок бўлган «Пахтакор» жамоаси хотирасига бағишлаб ёдгорлик ўрнатилди. Бу ҳақда ЎФФ матбуот хизмати хабар тарқатди.

11 август соат 09:00да Боткин қабристонида мазкур ёдгорликнинг очилиш маросими бўлиб ўтди. Янги ёдгорликнинг очилишига бағишланган тадбирда футбол жамоатчилиги билан бир қаторда, ОАВ вакиллари ва ЎФФ ва ПФЛ раҳбарияти қатнашди.

Маълумот ўрнида, 6 август куни 1979 йилги авиаҳалокатда ҳаётдан кўз юмган «Пахтакор» жамоаси аъзолари хотирасига бағишлаб, ҳар йили анъанавий тарзда ўтказиладиган «Хотира қанотлари» турнири старт олган эди. Мазкур турнирда Турманистон, Қозоғистон каби қўшни мамлакатлардан ташриф буюрган 1998-99 йилларда туғилган ўсмир футболчилар иштирок этишмоқда. 11 август куни ушбу турнирнинг финал учрашуви бўлиб ўтади. Финалда Тошкентнинг «Пахтакор» ҳамда Муборакнинг «Машъал» клуби ёшлари мусобақа ғолиблиги учун куч синашадилар.