19 ёшли яримҳимоячи Томми Маркес Ла Лиганинг ўтган турида "Мальорка"га қарши ўйинда дебют қилганидан кейин "Барселона"нинг асосий жамоасида ишлашда давом этади. Бу ҳақда The Touchline хабар бермоқда.
Манбага кўра, Маркес каталонияликлар бош мураббийи Ханс-Дитер Фликка жуда ёқади. Германиялик мутахассис Томмини диққат билан кузатишни режалаштирмоқда ва у "Пари Сен-Жермен"га кетган Дро Фернандеснинг ўрнига идеал ўринбосар бўлишига ишонмоқда.
Испания чемпионатининг 23-турида "Барселона" ўз майдонида "Мальорка"ни йирик ҳисобда мағлуб этди. Маркес 84-дақиқада Фермин Лопес ўрнига майдонга тушди.













