«AS» нашрининг якшанба кунги сонида «Реал»нинг келаси ёзги трансфер режаларига бағишланган мақола чоп этилди. Унда айтилишича, Мадрид клуби иккита марказий ҳимоячи ва битта ярим ҳимоячи сотиб олишни мақсад қилган.

Ярим ҳимоя чизиғи учун асосий номзод сифатида «ПСЖ» юлдузи Витинья кўрилмоқда. Бироқ, «Реал» ва «ПСЖ» ўртасидаги муносабатларнинг совуқлиги (Мбаппе трансферидан кейин) бу келишувни деярли имконсиз қилиб қўйиши мумкин.

Шу сабабли, «қироллик» клуби захира вариантини тайёрлаб қўйди — бу Нидерландиянинг АЗ жамоаси аъзоси, 20 ёшли Кес Смит. Уни сотиб олиш Витиньяга қараганда анча осонроқ ва молиявий жиҳатдан фойдалироқ ҳисобланади. «Transfermarkt» ёш нидерландияликни 22 миллион еврога баҳоламоқда, аммо АЗ унинг учун 60 миллион еврогача маблағ сўраши мумкин.