«Ан-Наср» ҳужумчиси Криштиану Роналду клуб раҳбариятининг бошқарувидан норози бўлиб, жамоа ўйинларига бойкот эълон қилмоқда. Ушбу вазият юзасидан саудиялик таниқли телекўрсатув бошловчиси Валид ал-Фараж ўз фикрини билдирди.

«Саудия Арабистонининг спорт тизими ва лиганинг умумий регламенти — бу «қизил чизиқ». Жаҳон юлдузи мақоми ҳеч кимга қоидаларни бузиш ҳуқуқини бермайди. Саудия лигаси ҳар қандай ўйинчидан устундир. Криштиану регламентни ҳурмат қилиши ва қонунларга бўйсуниши шарт. Биз Роналдунинг олдида тиз чўкмаймиз. Сиз нимани хоҳлайсиз? Уни ялиниб-ёлвориб қайтаришимизними? Бизнинг мамлакатимиз ва лигамиз ҳамма нарсадан устун», — дея ал-Фаражнинг сўзларини «NewsRoom» нашри келтирмоқда.

Эслатиб ўтамиз, Криштиану Роналдунинг «Ан-Наср» билан шартномаси 2027 йилнинг ўрталарига қадар мўлжалланган.