«An-Nasr» hujumchisi Krishtianu Ronaldu klub rahbariyatining boshqaruvidan norozi bo‘lib, jamoa o‘yinlariga boykot e’lon qilmoqda. Ushbu vaziyat yuzasidan saudiyalik taniqli teleko‘rsatuv boshlovchisi Valid al-Faraj o‘z fikrini bildirdi.
«Saudiya Arabistonining sport tizimi va liganing umumiy reglamenti — bu «qizil chiziq». Jahon yulduzi maqomi hech kimga qoidalarni buzish huquqini bermaydi. Saudiya ligasi har qanday o‘yinchidan ustundir. Krishtianu reglamentni hurmat qilishi va qonunlarga bo‘ysunishi shart. Biz Ronalduning oldida tiz cho‘kmaymiz. Siz nimani xohlaysiz? Uni yalinib-yolvorib qaytarishimiznimi? Bizning mamlakatimiz va ligamiz hamma narsadan ustun», — deya al-Farajning so‘zlarini «NewsRoom» nashri keltirmoqda.
Eslatib o‘tamiz, Krishtianu Ronalduning «An-Nasr» bilan shartnomasi 2027 yilning o‘rtalariga qadar mo‘ljallangan.
