Мадриднинг «Реал» клуби ўнг қанот ҳимоячиси Даниэль Карвахаль яна майдонга тушмади. 34 ёшли футболчи жароҳатидан қутилиб, сафга қайтган бўлса-да, Альваро Арбелоа юлдуз фахрийни майдонга туширишга шошилмаяпти. Якшанба куни «Валенсия»га қарши кечган баҳсда (2:0) латераль кетма-кет тўртинчи ўйинда ҳам захира ўриндиғида қолди.
«ESPN» берган маълумотларга кўра, учрашув якунлангач, Карвахаль жуда хафа бўлган ва жамоанинг фитнес бўйича мураббийи Антонио Пинтус билан суҳбатда ўз норозилигини очиқчасига билдирган. Италиялик мутахассис футболчига далда беришга ҳаракат қилган, бироқ, афтидан, бунинг уддасидан чиқа олмаган.
Даниэль Карвахаль жорий мавсумда «Реал»нинг ўнта ўйинида иштирок этди. Сардорнинг шартномаси шу йилнинг ёзида ниҳоясига етади.
