Madridning «Real» klubi o‘ng qanot himoyachisi Daniel Karvaxal yana maydonga tushmadi. 34 yoshli futbolchi jarohatidan qutilib, safga qaytgan bo‘lsa-da, Alvaro Arbeloa yulduz faxriyni maydonga tushirishga shoshilmayapti. Yakshanba kuni «Valensiya»ga qarshi kechgan bahsda (2:0) lateral ketma-ket to‘rtinchi o‘yinda ham zaxira o‘rindig‘ida qoldi.

«ESPN» bergan ma’lumotlarga ko‘ra, uchrashuv yakunlangach, Karvaxal juda xafa bo‘lgan va jamoaning fitnes bo‘yicha murabbiyi Antonio Pintus bilan suhbatda o‘z noroziligini ochiqchasiga bildirgan. Italiyalik mutaxassis futbolchiga dalda berishga harakat qilgan, biroq, aftidan, buning uddasidan chiqa olmagan.

Daniel Karvaxal joriy mavsumda «Real»ning o‘nta o‘yinida ishtirok etdi. Sardorning shartnomasi shu yilning yozida nihoyasiga yetadi.