"Ливерпуль" билан ўйинда Жанлуиджи Доннарумма билан тўқнашиб кетган ҳамюртимиз Абдуқодир Ҳусанов захирага олинди.
Ҳозирда ЎФА Тиббий қўмита раиси, "Локомотив" бош шифокори бўлиб ишлаётган Аброр Пирриев ушбу вазиятга муносабат билдирди.
«Тиббий ёрдам кўрсатиш учун майдонга чиққан жамоа шифокори Абдуқодирда бош мия чайқалиши ташхисини қўйди ва уни захирага олиш зарур деган тўғри қарорга келди.
Футболчи шижоатини кўрган бош мураббий уни қўллашга уриниб кўрди. Аммо жамоа шифокори эҳтиросга берилмади ва ўз қарорида турди. Шифокорнинг бу профессионал ҳаракатидан энг катта фойда Абдуқодирга бўлди.
Чунки бош миянинг енгил даражадаги чайқалиши ҳам жисмоний зўриқиш туфайли жиддий оқибатларга пойдевор бўлиши мумкинлиги, шунингдек, ён-атрофдагиларга безарар кўринувчи бу ҳолат футболчининг майдонда жиддий хатоликларини ва турли жароҳатлар олиш эҳтимолини карраларга ошириши борасидаги илмий асосларни профессионал шифокордан бўлак кимса билмайди ва ўйлаб ҳам кўрмайди.
Хуллас, жамоа шифокорига “респект”!», - деб ёзди Пирриев ўз телеграм-каналида.
