«Манчестер Сити» бош мураббийи Хосеп Гвардиола жамоа сардори Бернарду Силванинг баёнотига изоҳ берди.

Якшанба куни «Ливерпуль» устидан қозонилган ғалабадан (2:1) сўнг, португалиялик ярим ҳимоячи агар «Энфилд»да мағлубиятга учралганда, чемпионлик пойгаси якунланиши мумкин эди, деб айтганди. Ҳозирда маррага 13 тур қолганда «шаҳарликлар» «Арсенал»дан олти очко ортда қолмоқда.

«Мен вазиятга оптимистик руҳда қарайман. Биламан, «Арсенал»нинг ўйинини ҳисобга олсак, тўққиз очколик фарқ — бу жуда кўп. Улар яна уч-тўрт марта мағлуб бўлишадими? Эҳтимол, йўқ. Аммо футболда нима бўлишини ҳеч қачон олдиндан айтиб бўлмайди», — деди Гвардиола матбуот анжуманида.

Чоршанба, 11 февраль куни «Манчестер Сити» ўз майдонида «Фулхэм» билан тўқнаш келади.