Криштиану Роналду бойкотни якунламоқда. Португалиялик футболчи дам олиш кунлари Саудия Арабистони чемпионати доирасидаги «Ал-Фатеҳ»га қарши ўйинда майдонга тушиши кутилмоқда.
«A Bola» нашрининг хабар беришича, «Ан-Наср» раҳбарияти португалиялик юлдуз томонидан бўлган босим остида унинг иккита талабини бажарди. Биринчидан, сўнгги соатлар ичида Ар-Риёд клуби ходимлар олдидаги барча қарздорликларни ёпди. Иккинчидан, Роналдуга яқин бўлган спорт блокидаги шахслар — Жозе Семеду ва Симау Континьо ўз ваколатларига қайтарилди. Аввалроқ ушбу икки функционер қишки трансфер кампанияси вақтида муҳим қарорлар қабул қилиш ҳуқуқидан маҳрум этилган эди.
Ҳозирда «Ан-Наср» Про-лига турнир жадвалида иккинчи ўринни эгаллаб турибди ва «Ал-Ҳилол»дан бир очко ортда қолмоқда.
