«Барселона» вингери Рафинья ўзининг соғлиғи борасидаги ҳолатга тўхталиб ўтди.

Аввалроқ, ҳужумкор ярим ҳимоячининг ўнг сонидаги мушакларида зўриқиш аниқлангани хабар қилинган эди. У Испания Кубоги 1/4 финали доирасидаги «Альбасете»га қарши сафар учрашувини (2:1) ва Ла Лигадаги «Мальорка» билан баҳсни (3:0) ўтказиб юборди.

«Ўзимни яхшироқ ҳис қиляпман, биз босқичма-босқич олдинга ҳаракат қиляпмиз. Пайшанба кунигача тайёр бўламанми-йўқми, кўрамиз, кутамиз. Имкониятлар бор, лекин барчамиз жароҳатлар қанчалик тез-тез содир бўлишини биламиз. Жамоани соғиндим», — деди Рафинья.

Эслатиб ўтамиз, пайшанба куни «Барселона» Испания Кубоги ярим финали доирасида сафарда «Атлетико»га қарши майдонга тушади.