«Реал» ҳимоячиси Дани Карвахаль ўтган ҳафтада тиззасини ихтисослаштирилган клиникада текширтириш учун Лондонга борди, деб хабар бермоқда «As» нашри.

Мадридликлар сардори 2024 йилда ўнг тиззасидаги олдинги хочсимон бойламлари, латерал коллатерал бойламлари ва тизза ости пайларини узиб олган эди. У тизза қопқоғидаги жиддий муаммоларни келтириб чиқараётган «бўш тана» туфайли 2025 йилнинг октябрь ойида ўйнашни тўхтатишга мажбур бўлганди.

Бироқ, «Мадрид» тиббий штабига тақдим этилган тиббий хулосада айтилишича, ҳозирда бу муаммо тўлиқ ҳал қилинган.

Карвахаль Англияга Антонио Рюдигер ҳамроҳлигида ташриф буюрди. Рюдигер «Челси»даги фаолияти давомида ушбу Лондон клиникаси билан таниш бўлгани учун имкониятдан фойдаланиб, ўзи ҳам кўрикдан ўтишга қарор қилган. Данининг «бўшашиб қолган бўғим» борасидаги барча шубҳалари кўрикдан сўнг тарқаб кетди. Ҳеч қандай жиддий муаммо аниқланмади, шунинг учун тиббий кўрсатмаларга кўра, ҳозирда ўйин амалиётига эга бўлмаётган футболчи майдонга тушишга тайёр.