«Real» himoyachisi Dani Karvaxal o‘tgan haftada tizzasini ixtisoslashtirilgan klinikada tekshirtirish uchun Londonga bordi, deb xabar bermoqda «As» nashri.

Madridliklar sardori 2024 yilda o‘ng tizzasidagi oldingi xochsimon boylamlari, lateral kollateral boylamlari va tizza osti paylarini uzib olgan edi. U tizza qopqog‘idagi jiddiy muammolarni keltirib chiqarayotgan «bo‘sh tana» tufayli 2025 yilning oktyabr oyida o‘ynashni to‘xtatishga majbur bo‘lgandi.

Biroq, «Madrid» tibbiy shtabiga taqdim etilgan tibbiy xulosada aytilishicha, hozirda bu muammo to‘liq hal qilingan.

Karvaxal Angliyaga Antonio Ryudiger hamrohligida tashrif buyurdi. Ryudiger «Chelsi»dagi faoliyati davomida ushbu London klinikasi bilan tanish bo‘lgani uchun imkoniyatdan foydalanib, o‘zi ham ko‘rikdan o‘tishga qaror qilgan. Danining «bo‘shashib qolgan bo‘g‘im» borasidagi barcha shubhalari ko‘rikdan so‘ng tarqab ketdi. Hech qanday jiddiy muammo aniqlanmadi, shuning uchun tibbiy ko‘rsatmalarga ko‘ra, hozirda o‘yin amaliyotiga ega bo‘lmayotgan futbolchi maydonga tushishga tayyor.