"Тоттенхэм", "ПСЖ" ва "Челси" клубларининг собиқ бош мураббийи Маурисио Почеттино бир кун келиб Англия Премьер-лигасида (АПЛ) ғолиб чиқишига ишонишини маълум қилди.
Ҳозирги вақтда Почеттино АҚШ терма жамоасини бошқармоқда ва жамоани уйда ўтадиган ЖЧ-2026га тайёрламоқда.
"Ҳа, мен Премьер-лигада ғолиб чиқишимга ишонаман. Бу мен учун жуда муҳим. Агар сен ишонмасанг, ичингда ўша интилиш, иштиёқ ва курашиш ҳисси бўлмаса, муваффақиятга эришиш қийин.
Чемпионлар Лигаси — бу ажойиб турнир, у худди жаҳон чемпионати каби бир орзу. Лекин мен инглиз футболини чиндан ҳам яхши кўраман, футбол шу ерда туғилган.
Мен ҳаракат қилишда давом этаман. Афсуски, бу қайси клуб билан амалга ошишини ҳозирча билмайман", — деди Почеттино "The High Performance Podcast" подкастида.
