"Барселона" президенти Рафа Юсте "Реал" мураббийи Альваро Арбелоанинг "Негрейра иши" ҳақидаги фикрларига изоҳ беришни истамади.
"Мен бор эътиборимни "Барселона"га қаратганман ва клубимиздаги асосий шахсларга, бу ўринда спорт бўлимига қулоқ соламан. Флик, унинг штаби, Деку ва Боянни тўлиқ қўллаб-қувватлайман, тамом. "Мадрид" ёки бошқа бирор жамоа ҳақида айтадиган гапим йўқ.
Ҳозир бор диққатим пайшанба кунги Мадрид сафарига ва Испания Кубоги ярим финали доирасидаги ["Атлетико"га қарши] ажойиб ўйин ўтказишга қаратилган. Флик айтганидек, қадамма-қадам олдинга интиламиз", — деди Юсте.
"Блауграна" вице-президенти бўлган Юсте, клуб раҳбари Жоан Лапорта 15 мартдаги қайта сайловда иштирок этиш учун истеъфога чиққанидан сўнг президентлик лавозимини эгаллади. Ушбу жараён клуб уставига мувофиқ амалга оширилиши шарт.
