Англия терма жамоаси мухлислари "талончилик" даражасидаги юқори нархлар туфайли Жаҳон чемпионати чипталарини сотиб олишдан оммавий равишда воз кечишмоқда. Умумий ҳисобда фанатлар аллақачон 6000 та жой учун берилган таклифни рад этишди, буларнинг орасида нархи 3130 фунтдан 6489 фунтгача бўлган 1000 дан ортиқ финал чипталари ҳам бор.

"England Supporters Travel Club"нинг 30 000 аъзосидан 90 фоизи ФИФА томонидан таклиф этилган чипталарни эътиборсиз қолдирди. Англия футбол ассоциацияси 19 июль куни Нью-Жерсидаги "МетЛайф Стэдиум"да (82 000 ўринли) бўлиб ўтадиган финал учун ажратилган 4500 та чиптадан фақат 3409 тасини сота олди, холос.

Сотилмай қолган 1091 та чиптанинг умумий қиймати 7,1 миллион фунтдан ошади — уларнинг деярли барчаси 1-тоифадаги энг қиммат секторларга тегишли.

Шунингдек, Англия футбол ассоциацияси ЖЧ ярим финали учун ажратилган 3500 та жойдан 2686 тасини сотди. 45 фунтлик 500 та бюджет вариантидан ташқари, қолган чипталар нархи 687 фунтдан 2370 фунтгача ўзгариб туради.