Мадриднинг "Атлетико" клуби Италиянинг "Аталанта" жамоасидан бразилиялик ярим ҳимоячи Эдерсон Лоуренсони сотиб олиш бўйича яна бир бор музокаралар олиб боришга ҳаракат қилади. Бу ҳақда журналист Маттео Моретто ўз ижтимоий тармоқларида маълум қилди.
26 ёшли Эдерсон, амалдаги шартномаси 2027 йилда якунига етадиган бўлса-да, ўзини юқори даражали футболчи сифатида кўрсата олди ва Европанинг бир қанча йирик клублари томонидан жамоани кучайтириш учун номзод сифатида кўрилмоқда.
Италия клуби футболчини ўз сафида сақлаб қолиш истагини билдирган ва уни фақат катта маблағ эвазига қўйиб юборишга тайёрлигини маълум қилган эди. Қишги трансфер ойнасида рад жавобини олган бўлишига қарамай, "Атлетико" март ойида "Аталанта" билан келишишга яна бир бор уриниб кўради.
Жорий мавсумда Эдерсон 28 та ўйинда майдонга тушиб, 1 та гол урди ва 1 та голли узатмани амалга оширди. "Transfermarkt" портали унинг бозор қийматини 40 миллион еврога баҳоламоқда.
