«Челси» бош мураббийи Лиам Росеньор Премьер-лига доирасида «Лидс» билан ўйинда қўлдан бой берилган ғалаба (2:2) ҳақида фикр билдирди.
«Кўклар» Жоао Педро ва Коул Палмернинг 24 ва 58-дақиқаларда киритган голлари эвазига 2:0 ҳисобида олдинда бораётган эди. Меҳмонлар 67 ва 73-дақиқаларда Лукас Нмеча ҳамда Ноа Окафорнинг саъй-ҳаракатлари билан мувозанатни тиклашди.
«Ҳамма нарса олти дақиқа ичида содир бўлган иккита вазият туфайли ҳал бўлди. Биз ғалаба қозонишимиз шарт эди, лекин айнан шу икки эпизод сабабли икки очко йўқотдик. Биз «Лидс»га дуранг совға қилдик.
Футболда, агар ҳал қилувчи вазиятларда хатога йўл қўйсангиз, ҳар қандай воқеа содир бўлиши мумкин. Ўша даврдан олдин ва кейин бутун ўйин давомида рақибдан яхшироқ ўйнаган бўлсак-да, иккита гол ўтказиб юбордик. Албатта, бундай ҳолат юз бермаслиги керак эди. Бундай вазиятлар яна такрорланмаслиги учун футболчилар билан муайян масалаларни муҳокама қилиб олишим керак», — дея BBC Росеньорнинг сўзларидан иқтибос келтирмоқда.
