«Ноттингем Форест» ярим ҳимоячиси Морган Гиббс-Уайт фаолиятини бошқа клубда давом эттириши мумкин. «Teamtalk» нашрининг хабарига кўра, 26 ёшли футболчининг трансферига Бирмингемнинг «Астон Вилла» клуби жиддий қизиқиш билдирмоқда.
Англиялик футболчининг бозор қиймати 65 миллион еврога баҳоланмоқда. Морган ва «ўрмончилар» ўртасидаги амалдаги шартнома 2028 йилнинг июнь ойи охиригача амал қилади.
Англия Премьер-лигасининг жорий мавсумида Гиббс-Уайт 26 та ўйинда майдонга тушди. Ярим ҳимоячи ўз ҳисобига 6 та гол ва 2 та голли узатмани ёздириб қўйган.
Айни дамда «Астон Вилла» АПЛ турнир жадвалида кучли учликни якунлаб турибди (3-ўрин), «Ноттингем Форест» эса 17-поғонани эгаллаб, лигада жон сақлаб қолиш учун курашмоқда.
