«Манчестер Юнайтед»нинг собиқ ҳужумчиси Луи Саа «қизил иблислар»нинг «Реал» форварди Винисиус Жуниорга бўлган қизиқиши ҳақидаги миш-мишларга ўз муносабатини билдирди. У бразилиялик футболчининг «МЮ»га ўтишини инкор этиб бўлмаслигини таъкидлади.

«Агар Майкл Кэррик бош мураббийлик лавозимини сақлаб қолса, «Манчестер Юнайтед» Винисиус Жуниорни сотиб олиши мумкин. Винисиус — «Олтин тўп»га номзод. Ким билади дейсиз? Бу жуда жозибали уйғунлик бўлиши мумкин: Кэррик қўл остида ҳар ҳафта жуда чиройли футбол кўрсатаётган жамоа ва Винисиусдек футболчи учун янги чорлов», — дея Саанинг сўзларини келтирмоқда «AceOdds».

Маълумот учун, Майкл Кэррик айни дамда «Манчестер Юнайтед»да вақтинчалик мураббий бўлиб ишлаётган бўлса-да, унинг қўл остидаги ўйин услуби кўплаб мутахассислар томонидан ижобий баҳоланмоқда.

Жорий мавсумда Винисиус Жуниор «Реал» сафида барча мусобақаларда 33 та ўйинда майдонга тушиб, 8 та гол урди ва 11 та голли узатмани амалга оширди.