«Наполи»нинг шотландиялик ярим ҳимоячиси Скотт Мактоминай жароҳатига қарамай, майдонга қайтишга интилмоқда. У жамоа учун жуда муҳим футболчи ҳисобланади — биринчидан, унинг майдондаги фойдалилик коэффициенти юқори, иккинчидан, «Наполи» лазарети ҳозирда бошқа жароҳатланган футболчилар билан тўлиб тошган.

«Corriere della Sera» нашрининг хабарига кўра, шотландиялик футболчи «Рома»га қарши бўлажак муҳим баҳсда майдонга тушишга қатъий қарор қилган. У ўтган ўйинда Антонио Конте томонидан муддатидан аввал алмаштирилишига сабаб бўлган яллиғланиш оғриқларига қарамай, машғулотларни давом эттирмоқда.

Эслатиб ўтамиз, «Наполи» ва «Рома» ўртасидаги учрашув 15 февраль, якшанба куни Италия А Сериясининг 25-тури доирасида бўлиб ўтади.