Лондоннинг «Тоттенхэм» клуби шошилинч равишда мавсум якунига қадар вақтинчалик мураббий қидирмоқда. Бу ҳақда «Sun Sport» нашри хабар бермоқда.
Таъкидланишича, айни дамда «шпорлар» Германия ва АҚШ терма жамоалари собиқ устози Юрген Клинсманн, ўзларининг собиқ мураббийи Харри Реднапп, шунингдек, «Ференцварош» бош мураббийи Робби Кин номзодларини кўриб чиқмоқда.
Манбанинг хабарига кўра, 2026 йилги жаҳон чемпионати якунланганидан кейин «Тоттенхэм» бош мураббийлик лавозимига Маурисио Почеттинони қайтаришга ҳаракат қилади. Аргентиналик мутахассис 2019 йилда жамоани Чемпионлар Лигаси финалига олиб чиққан ва у ерда «Ливерпуль»га имкониятни бой берган эди (0:2).
Ҳозирда пойтахт клуби Премьер-лига турнир жадвалида 26 турдан сўнг 29 очко жамғариб, 16-ўринни эгаллаб турибди.
