«Манчестер Юнайтед» устози Майкл Кэррик январь ойи якунларига кўра Англия Премьер-лигасининг энг яхши мураббийи деб топилди. Бу ҳақда АПЛ матбуот хизмати хабар бермоқда.
Кэррик 13 январь куни «Манчестер Юнайтед» бошқарувини қўлга олган эди. Ой якунига қадар «қизил иблислар» бор-йўғи иккита ўйин ўтказишди, бироқ уларда шов-шувли натижаларни қайд этишди. Манкунианликлар дастлаб ўз майдонларида «Манчестер Сити»ни (2:0), сўнгра сафарда «Арсенал»ни (3:2) мағлуб этишди.
Айни дамда «Манчестер Юнайтед» Англия чемпионати турнир жадвалида тўртинчи поғонани эгаллаб турибди. Майкл Кэррик жамоаси навбатдаги учрашувини 23 февраль куни сафарда «Эвертон»га қарши ўтказади.
