Испания Кубоги 1/2 финали доирасидаги «Барселона» ва «Атлетико» ўртасидаги учрашув бош ҳаками Хуан Мартинес Мунуэра ўйиндан кейинги ҳисоботида офсайдни аниқлашда VAR тизими ишламай қолгани сабабини баён қилди. Ўйин «Атлетико»нинг 4:0 ҳисобидаги ғалабаси билан якунланди.

"Таҳлил давомида футболчиларнинг зич жойлашгани сабабли тизим ўйинчиларни скелет даражасида моделлаштиришда муаммога дуч келгани аниқланди. Моделни қайта калибрлашга уриниш ва белгиланган процедурага мувофиқ бунинг иложи йўқлиги маълум бўлгач, VAR жамоаси якуний ва тўғри қарор қабул қилиш учун офсайд чизиқларини қўлда чизишга киришди", — дейилади ҳакам Мунуэранинг ҳисоботида.

Ҳакамга «Барселона» ҳимоячиси Пау Кубарсининг иккинчи бўлимда, 52-дақиқада урган голини офсайд сабабли бекор қилиш учун олти дақиқадан кўпроқ вақт керак бўлди.

Эслатиб ўтамиз, ушбу турнирнинг амалдаги ғолиби «Барселона» ҳисобланади. Аввалги мавсум финалида «кўк-анорранглилар» Мадриднинг «Реал» клубини қўшимча бўлимларда 3:2 ҳисобида мағлуб этишган эди.