Мадриднинг «Реал» клуби собиқ бош мураббийи Хаби Алонсо Англия клубига тайинланиш борасидаги музокаралар учун Ноттингемга етиб келди. Бу ҳақда Британия ОАВлари хабар бермоқда.
Манбаларнинг маълум қилишича, испаниялик мутахассис «Ноттингем Форест» билан келишувга эришишга жуда яқин турибди. Хабар қилинишича, у жамоа бошқарувида яқиндагина истеъфога чиқарилган Шон Дайчнинг ўрнини эгаллаши мумкин.
Хаби Алонсо 2026 йилнинг 12 январь куни, етти ойлик фаолиятидан сўнг Мадриднинг «Реал» клуби бош мураббийлигидан бўшатилган эди. Клуб раҳбариятининг бундай қарори жамоанинг беқарор натижалари, хусусан, Испания Суперкубоги финалида «Барселона»дан қабул қилинган мағлубиятдан (2:3) сўнг қабул қилинган.
Эслатиб ўтамиз, 2025 йилнинг ёзида Мадрид клубига тайинлангунга қадар Алонсо Германиянинг «Байер» жамоасида муваффақиятли фаолият юритган. У 2023/2024 йилги мавсумда Леверкузен клубини ўз тарихидаги илк Германия чемпионлигига, шунингдек, мамлакат Кубоги ва Суперкубогидаги ғалабаларга етаклаган эди.
