"Милан" "Пиза" устидан қозонилган ғалабадан сўнг 24 турдан кейин тўпланган очколар бўйича 1995/1996 йилги мавсум кўрсаткичини такрорлади.
Учрашув "россонери" фойдасига 2:1 ҳисобида якунланди. "Милан" таркибида Рубен Лофтус-Чик ва Лука Модрич гол уришга муваффақ бўлишди.
Никлас Фюллькруг пенальтидан фойдалана олмади, Адриен Рабьо эса ҳакам томонидан қўшиб берилган вақтда майдондан четлатилди.
Шу тариқа, "Милан" 53 очко жамғарди. Роппа-роса 31 йил аввал ҳам худди шунча турдан кейин жамоа ҳисобида айнан шунча очко мавжуд эди.
"Россонерилар" бундан кўп очкони фақат бир марта тўплаган — 2003/2004 йилги мавсумда жамоада 61 очко бўлган. Эслатиб ўтамиз, "Милан" турнир жадвалида иккинчи ўринда бормоқда, "Интер" эса пешқадамлик қилмоқда.
