Миланнинг "Интер" клуби бош мураббийи Кристиан Киву "Ювентус" устидан қозониладиган ғалаба чемпионлик пойгасига нуқта қўйиши ёки қўймаслиги ҳақидаги саволга жавоб берди.
"Биз майдонга доим ғалаба қозониш истаги билан тушамиз. Олдинда яна 14 та ўйин бор, битта натижа чемпионлик пойгаси тақдирига кучли таъсир кўрсатмайди, фақатгина психологик нуқтаи назардан аҳамиятли бўлиши мумкин. Мавсум ҳали узоқ", — дея Кивунинг сўзларини келтиради клуб матбуот хизмати.
Италия А Сериясининг 25-тури бошланиши олдидан "Интер" 58 очко билан турнир жадвалида пешқадамлик қилмоқда. "Ювентус" эса 46 очко жамғарган ҳолда тўртинчи ўринда бормоқда.
"Интер" ва "Ювентус" ўртасидаги ўйин 14 февраль куни бўлиб ўтади. Қарама-қаршилик Тошкент вақти билан соат 00:45 да бошланиши режалаштирилган.
