"Бавария" ҳужумчиси Харри Кейн Европанинг кучли бешлик чемпионатларида 300 та гол урган футболчиларнинг элита клубига аъзо бўлди.

Англиялик футболчи ушбу маррани забт этган тўққизинчи ўйинчига айланди. Мюнхенликлар ҳужумчиси ўзининг 300-голини шанба куни Бундеслига доирасида кечган "Вердер"га қарши баҳсда (3:0) киритди. Кейнга қадар 300 ва ундан ортиқ голларни Лионель Месси, Криштиану Роналду, Роберт Левандовски, Жимми Гривз, Герд Мюллер, Стив Блумер, Дикси Дин ва Златан Ибраҳимович уришга муваффақ бўлишган.

Европанинг етакчи лигаларидаги умумий голлар сони бўйича рекордчи Лионель Месси бўлиб турибди — 396 та гол. Криштиану Роналду ундан атиги битта тўпга ортда қолмоқда. Иккала футболчи ҳам фаолиятини давом эттиришмоқда, бироқ эндиликда Европадан ташқарида тўп суришмоқда.

"Бавария"га ўтишдан олдин Харри Кейн узоқ йиллар давомида "Тоттенхэм" шарафини ҳимоя қилган.