Нигериялик ҳужумчи Виктор Осимхен Германиянинг "Бавария" клуби эътиборини тортди. Бу ҳақда "UTD Bash" нашри хабар бермоқда.
Қайд этилишича, ҳозирда Туркиянинг "Галатасарой" жамоаси шарафини ҳимоя қилаётган 27 ёшли футболчининг хизматларига Европанинг бошқа қатор клублари ҳам қизиқиш билдирмоқда.
Фаолияти давомида Осимхен, хусусан, "Вольфсбург", "Лилль" ва "Наполи" клубларида тўп сурган. Ўз мамлакати терма жамоаси таркибида эса Африка вице-чемпиони ҳамда икки карра қитъа биринчилигининг бронза медали соҳибига айланган. У терма жамоа сафида 52 та ўйинда 35 та гол уришга муваффақ бўлган.
Жорий мавсумда Осимхен барча клуб турнирлари доирасида 22 та ўйинда майдонга тушиб, 15 та гол ва 3 та голли узатмани ўз ҳисобига ёздириб қўйди. "Transfermarkt" портали талқинига кўра, ўйинчининг бозор қиймати 75 миллион еврони ташкил этади.
