"Барселона" ҳимоячиси Даниэл Алвес жамоанинг янги ҳужумчиси Неймар борасида шахсий фикрлари билан ўртоқлашди. Интервью Mundo Deportivo`да нашр этилган.
-Неймарнинг ўтиши ҳақида қачон билгандингиз?
-Ҳамма қатори, трансфер амалга ошганда.
-Лекин сиз олдиндан ушбу трансфер амалга ошишига қатьий ишонгандингиз.
-Агар у "Сантос"ни тарк этса, "Барселона"га келишига ишончим комил эди. Чунки унинг ўзи шуни хоҳларди. Агар кимдир ўзи истаган жамоага ўта олмаса, у ҳолда ўша клубида қолади.
Дўстим "Барселона"дек буюк клуб сафида футболдан завқланиб тўп суришини хоҳладим. Ўйлайманки, Неймар биздан кўп нарсани ўрганиши мумкин. У ажойиб йигит. Неймар ҳали болакай. Энди унинг ёш боладан ҳақиқий эркакка айланишини ва ҳамма нарсани ўрганишини истаяпман.
Неймар "Барселона"га жаҳоннинг энг яхшилари қаторида футболни ўрганиш умидида келди. Масалага нотўғри ёндошиш ярамайди. У етарлича камтар.
Ўйлашимча, Неймар тўғри жойни танлади. Бу ердагилар Жаҳон чемпионатларида қатнашишган, нимани ютиш мумкин бўлса ҳаммасини ютишган. Улар қолганлар учун намуна. Мен учун ҳам, ҳатто ўзим бу ерда анчадан буён бўлишимга қарамай.
Гап унинг маданияти, ўйини ва ўзини қандай тутиши ҳақида кетмоқда. Неймарнинг шу ерда яшаб ҳаммасини ўрганиб кетишини хоҳлаяпман.
-Месси ҳам аста-секин бошлаган...
-Албатта. Мен ҳар доим шуни мисол қилиб келтираман. Лео ўйнай бошлаганида етакчи Рональдиньо эди. Месси кутди ва ўрганди. Ҳаётда ҳар доим кута билмоқ керак.