«Ньюкасл» ярим ҳимоячиси Сандро Тонали келаётган ёзда катта маблағ эвазига сотиб юборилиши мумкин.

Италиялик футболчининг келажаги ноаниқлигича қолмоқда: «қарғалар» уни сотиш иштиёқида эмас, бироқ 90 млн евролик таклиф тушса, трансферга рози бўлишлари мумкин. Бу ҳақда инсайдерлар Фабрицио Романо ва Маттео Моретто хабар бермоқда. Эҳтимол, 25 ёшли футболчи Англияда қолади, чунки сўралаётган нарх анчадан бери даъвогарлар қаторида тилга олинаётган «Ювентус» учун жуда қимматлик қилади. Энг ҳақиқатга яқин вариант сифатида «Манчестер Юнайтед»га ўтиш кўрилмоқда — «қизил иблислар» футболчига аниқ қизиқиш билдирмоқда.

Машҳур Transfermarkt порталида Сандро Тоналининг тахминий баҳоси 75 млн евро этиб белгиланган.