Италия терма жамоаси устози Женнаро Гаттузо «Ювентус» билан бўлган яқиндаги учрашувдан сўнг танқидлар остида қолган «Интер» юлдузи Алессандро Бастонига ишонишда давом этади. Бу ҳақда Football Italia хабар бермоқда.
Бастони ҳимоячи Пьер Калюлюнинг "подкати"дан сўнг йиқилиб, «кекса синьора» аъзосининг иккинчи сариқ карточка олишига сабаб бўлгани учун мухлисларнинг ғазабига дучор бўлган эди. Шунингдек, Бастони рақиби майдондан четлатилганини жуда қаттиқ нишонлагани ҳам эътирозларга сабаб бўлди.
Таъкидланишича, юзага келган шов-шувларга қарамай, Гаттузо Бастонини жамоадан четда қолдириш имкониятини умуман кўриб чиқмаяпти ва уни яқинлашиб келаётган ўйинга чақиришни режалаштирмоқда.
26 март куни Италия Жаҳон чемпионати саралашининг плей-офф ярим финалида Шимолий Ирландияни қабул қилади. Ғалаба қозонилган тақдирда, италияликлар ҳал қилувчи баҳсда Уэльс ёки Босния билан тўқнаш келишади.
