Italiya terma jamoasi ustozi Jennaro Gattuzo «Yuventus» bilan bo‘lgan yaqindagi uchrashuvdan so‘ng tanqidlar ostida qolgan «Inter» yulduzi Alessandro Bastoniga ishonishda davom etadi. Bu haqda Football Italia xabar bermoqda.
Bastoni himoyachi Pyer Kalyulyuning "podkati"dan so‘ng yiqilib, «keksa sinyora» a’zosining ikkinchi sariq kartochka olishiga sabab bo‘lgani uchun muxlislarning g‘azabiga duchor bo‘lgan edi. Shuningdek, Bastoni raqibi maydondan chetlatilganini juda qattiq nishonlagani ham e’tirozlarga sabab bo‘ldi.
Ta’kidlanishicha, yuzaga kelgan shov-shuvlarga qaramay, Gattuzo Bastonini jamoadan chetda qoldirish imkoniyatini umuman ko‘rib chiqmayapti va uni yaqinlashib kelayotgan o‘yinga chaqirishni rejalashtirmoqda.
26 mart kuni Italiya Jahon chempionati saralashining pley-off yarim finalida Shimoliy Irlandiyani qabul qiladi. G‘alaba qozonilgan taqdirda, italiyaliklar hal qiluvchi bahsda Uels yoki Bosniya bilan to‘qnash kelishadi.
