Бразилия терма жамоаси собиқ ҳимоячиси Тьяго Силванинг ўғли, футболчи Яго Силва Англиянинг 15 ёшгача бўлган ўсмирлар терма жамоасида илк ўйинини ўтказди. Бу ҳақда Tribal Football хабар бермоқда.
Кичик Силва Бразилия терма жамоасида ўйнаши ҳам мумкин эди, бироқ у «уч шерлар»ни танлади. Яго ва унинг укаси Исаго Лондонда яшашади ва отаси илгари фаолият юритган «Челси» академиясида шуғулланишади. Англия U15 терма жамоасидаги дебют ўйинида Яго Силва жамоадошларига Кипр термасини 3:0 ҳисобида мағлуб этишга ёрдам берди.
Эслатиб ўтамиз, Тьяго Силва Лондон клуби таркибида Чемпионлар лигаси, УЕФА Суперкубоги ва клублар ўртасидаги жаҳон чемпионатида ғолиб чиққан.
