«Барселона» клубининг собиқ директори Тони Фрейша Ла Лиганинг 24-турида «кўк-анорранглилар»нинг «Жирона»дан учраган мағлубиятига (1:2) муносабат билдирди.

Ўйиннинг 86-дақиқасида Фран Бельтран гол уришидан олдин, «Жирона» ярим ҳимоячиси Клаудио Эчеверри тўпни ўзига тўғирлаб олаётганда «Барса» ҳимоячиси Жюль Кунденинг оёғига бутсасининг тишлари билан зарба берган. Француз футболчиси йиқилган, шундан сўнг Эчеверри тўпни Хоэль Рокага узатган, у эса Бельтранга голли пас берган.

Вазият VAR ҳакамлари томонидан кўриб чиқилди, чунки Эчеверри тўп билан ўйнаганидан сўнг рақиб оёғини босиб олган бўлиши мумкинлиги тахмин қилинганди. Бироқ бош ҳакам Сесар Сото Градо монитор ёнига чақирилмади. Якунда гол ҳисобга олинди ва жамоалар ўйинни майдон марказидан давом эттиришди.

«Биринчидан, биз жуда ёмон ўйнадик. Иккинчидан, «Жирона» ажойиб ўйин кўрсатди ва мен уларни ғалаба билан табриклайман. Ҳакамлар ҳақида эса бошқа дейдиган гап йўқ. Ҳамма ҳаммасини кўриб турибди. Улар — уятсиз ярамаслар, биз уларни судга беришимиз керак. Ва буни амалга оширамиз. Лекин аввал биз ушбу лигада ғолиб чиқамиз», — деб ёзди Фрейша.