Агар "Тоттенхэм" АПЛдан тушиб кетса ёки еврокубокларда иштирок эта олмаса, ўнлаб миллион фунт стерлинг йўқотиши мумкин.
26-турдан сўнг "шпорлар" Премьер-лигада 16-ўринни эгаллаб турибди ва хавфли ҳудуддан бор-йўғи 5 очко масофада жойлашган. The Telegraph нашрининг хабар беришича, агар Лондон клуби Чемпионшипга равона бўлса, баъзи ҳомийлар шартномаларни бир томонлама бекор қилиш ҳуқуқига эга бўлади.
Клубнинг етакчи тижорат ҳамкорларидан бири билан тузилган келишув муддати шу ёзда тугайди ва унинг узайтирилиши катта сўроқ остида турибди. Шунингдек, "Тоттенхэм" кейинги мавсумда еврокубокларда қатнашмаса, ҳомийлардан бериладиган манфаатли бонуслардан ҳам маҳрум бўлади.
Молиявий ҳолатга лондонликлар қурилиши учун 1 миллиард фунт сарфланган стадионнинг номлаш ҳуқуқини (нейминг) ҳалигача сота олмаганликлари ҳам салбий таъсир кўрсатмоқда.
"Фақатгина еврокубокларга чиқа олмагани учун белгиланадиган жарималар ўнлаб миллионни ташкил этади. Агар клуб АПЛдан чиқиб кетса, бу сумма янада каттароқ ва ҳалокатли бўлиши мумкин", — дейди ҳомийлик масалалари бўйича эксперт The Telegraph нашрига.
