Италиянинг «Аталанта» жамоаси бош мураббийи Раффаэле Палладино Чемпионлар лигаси плей-офф босқичи доирасида Дортмунднинг «Боруссия»сига қарши бўлиб ўтадиган сафар ўйини ҳақида фикр билдирди. Илк учрашув 17 февраль куни бўлиб ўтади.
«Ушбу спорт тури ва бу касб инсонга ақл бовар қилмайдиган ҳиссиётларни тақдим этади. Икки кундан бери ушбу ўйинга тайёргарлик кўрар эканман, адреналин таъсиридаман. Йигитлар ҳам майдонга тушишни интизорлик билан кутишмоқда. Мен жуда хурсандман ва кучга тўламан, барчамиз бундан завқ олишимиз керак», — дея мутахассиснинг сўзларини келтиради УEФА расмий сайти.
Шунингдек, мураббий Дортмунддаги каби ажойиб мухлисларнинг трибуналарда бўлиши ўйинга янада кўпроқ жозиба бағишлашини таъкидлаб ўтди.
Учрашув Тошкент вақти билан тунги соат 01:00 да (18 февралга ўтар кечаси) бошланади.
