Испания чемпионатининг 24-туридан сўнг «Барселона» пешқадамликни қўлдан чиқарди. «Реал»нинг «Реал Сосьедад» устидан қозонган ғалабасидан (4:1) икки кун ўтиб, «кўк-анорранглилар» «Жирона»га имкониятни бой беришди (1:2). Энди каталонияликлар азалий рақибларидан икки очкога ортда қолмоқда.

Яқинда бўлажак сайловларда иштирок этиш учун истеъфога чиққан «Барселона» собиқ президенти Жоан Лапорта жамоанинг чемпионлигига шубҳа қилмаяпти:

«Ла Лигада ғолиб чиқишимизга ҳеч қачон ҳозиргидек амин бўлмаганман. Бу ҳаммага ва ҳамма нарсага қарши кечадиган чемпионат бўлади, чунки бизнинг ғалаба қозонишимизни истамайдиганлар бор. Мен фақат спорт томонлама гапирмаяпман. Бизнинг чемпион бўлишимизни хоҳламайдиган маълум бир таъсир доиралари мавжуд», — дея Лапортанинг сўзларини келтиради The Touchline.

«Барселона» навбатдаги учрашувини 22 февраль куни ўз майдонида «Леванте»га қарши ўтказади.