"Атлетико" сўнгги вақтларда "Арсенал", "Челси", "Манчестер Юнайтед" ва, албатта, "Барселона" каби клублар билан боғланаётган ҳужумчиси Хулиан Альваресни қўйиб юбормоқчи эмас. Мадридликлар Альваресни сақлаб қолиш ниятида ва у билан шартномани узайтиришга умид қилмоқда.
Испаниянинг "Sport" нашри хабарига кўра, "Атлетико" аллақачон 26 ёшли Альваресга шартномани узайтириш бўйича таклиф юборган. Нуфузли "Transfermarkt" портали мутахассислари Хулиан Альваресни 100 миллион еврога баҳоламоқда. Жорий мавсумда аргентиналик форвард 34 та ўйинда майдонга тушиб, 12 та гол урди ва шерикларига 6 та голли узатмани амалга оширди.
"Атлетико" навбатдаги учрашувини 18 февраль куни Чемпионлар лигаси доирасида сафарда "Брюгге"га қарши ўтказади.
