"Барселона" ҳимоячиси Эрик Гарсия "Жирона" билан ўйинда жароҳатдан қутулиб қолди.
Гарсия Ла Лиганинг 24-туридан ўрин олган баҳснинг (1:2) 73-дақиқасида захирага олинган эди. Майдонни тарк этаётганда ҳимоячи сонининг орқа қисмини ушлаб олган, сўнгра захира ўриндиғига мушти билан зарба бериб, ўз ҳафсаласи пир бўлганини намойиш этганди.
Бугун эрталаб ўтказилган тиббий кўрик натижаларига кўра, Гарсияда жиддий жароҳат аниқланмади. Қайд этиш жоизки, футболчи жорий мавсумда "Барселона"нинг барча турнирлардаги 38 та ўйинида иштирок этган ва майдонда ўтказилган вақт бўйича (2938 дақиқа) жамоа етакчиси ҳисобланади.
"Барселона"нинг навбатдаги учрашуви якшанба куни бўлиб ўтади — каталонияликлар Ла Лиганинг 25-тури доирасида "Леванте"ни қабул қилишади.
