Мадриднинг "Реал" клуби бош мураббийи Альваро Арбелоа "Қироллик клуби" жорий мавсумдаги Чемпионлар лигасида ғалаба қозонишни мақсад қилганини таъкидлади. Сешанба, 17 февраль куни "қаймоқранглилар" мусобақанинг плей-офф босқичи илк ўйинида "Бенфика" билан тўқнаш келишади.
"Бизнинг мақсадимиз — шунчаки "Бенфика"ни мусобақадан чиқариб юбориш эмас, балки Чемпионлар лигасида ғолиб чиқиш. Клуб герби биздан шуни талаб қилади. Ушбу босқичдан ўтиш — бу қасд олиш эмас, балки ўз мақсадимиз сари ташланган қадамдир.
Лиссабондаги мағлубият? Бу янги ўйин, аввалгиси эса аллақачон таҳлил қилинган. Ўйлайманки, футболчилар яхшироқ ўйнашга қодир ва биз ўзимизни энг яхши томонлама кўрсатишимиз шарт", — дея Арбелоанинг сўзларини келтиради "Mundo Deportivo".
Эслатиб ўтамиз, "Бенфика" Чемпионлар лигаси умумий босқичининг 8-турида "Реал"ни 4:2 ҳисобида мағлуб этган эди. Шу сабабли "қаймоқранглилар" тўғридан-тўғри 1/8 финалга йўл ололмагандилар.
