Душанба куни "Барселона" сафарда "Жирона"га 1:2 ҳисобида имкониятни бой берди. Тур якунларига кўра, "кўк-анорранглилар" Ла Лигада пешқадамликни қўлдан чиқаришди. Испания матбуоти "Барселона" ярим ҳимоячиси Френки де Йонгни танқид қила бошлади. Нидерландиялик футболчи сардорлик боғичи билан майдонда 90 дақиқа ҳаракат қилди. Испан нашрларидан олинган шарҳлар тўпламини "The Touchline" тақдим этди.
"Де Йонг тўпга эгалик қилишни натижага айлантира олмаяпти ва жуда кам креативлик кўрсатмоқда", — деб ёзади Marca.
"Биринчи ўринни қайтариб олмоқчи бўлган жамоада унга ярим ҳимоячига хос авторитет етишмаяпти. У фақат бир хилдаги узатмаларни амалга оширмоқда ва ҳимояда қарор қабул қилишда сустлик қиляпти", — дейилади Mundo Deportivo саҳифаларида.
"Де Йонг "Барселона" яққол устунлик қилганда яхши ўйин кўрсатади, аммо мувозанат бузилганда қийинчиликка дуч келади. Айнан ўшанда унинг заиф томонлари кўриниб қолади", — деб ёзди Sport.
Ҳозирда "Барселона" турнир жадвалида "Реал"дан икки очкога ортда қолмоқда.
